Maun alin sira, hau sokadu tebes uainhira hau hare grupu Alkatiri nian halimar ho ita nia bandeira lulik iha Facebok. Senõra Nurima Alkatiri tau bandeira ida nee iha Facebook hodi halo propaganda hasoru ita nia Maun bot Taur Matan Ruak.
Laos deit Señora Nurima mak tau bandeira ida nee iha Facebook, ema husi grupu Alkatiri mos hasai ona bandeira ida nee iha neeba.
Hau simu katak Maun Mari mak fundador i Maun Lu mos veteranu bot ida no sira ema FRENTE duni maibee hau la simu katak sira nain rua nia fotograpia mak tau iha bandeira lulik ida nee. Grupu Alkatiri pribatiza ona partidu FRETILIN, halo CCF hanesan sira nia uma rasik, uainhira ami ba iha neeba balun hateke mai hanesan ami la pertense ba partidu ida nee, foin grupu Alkatiri hakarak pribatiza tan bandeira lulik partidu FRETILIN nian.
Hau husu ba militante FRETILIN hotu hodi la simu bandeira ho fotu Maun Mari no Maun Lu nian tan ba ema barak mate tan ba bandeira ida nee. Bandeira FRETILIN bandeira lulik ema barak mate iha bandeira FRETILIN nia okos, grupu Alkatiri labele hamoe, hamonu i halimar ho bandeira FRETILIN.
Señora Nurima la bele hanoin katak bele halo bandeira ida nee tuir ninia bontade no aat liu tan tau nia aman nia foto iha neeba.Bandeira ida nee partense ba militante hotu no ita tenki tane aas bandeira FRETILIN hodi fo onra ba ita nia matebian sira. Kala ita halimar ho bandeira ida ne'e matebian sira sei mai babeur ita hotu. Matebian sira kala hahuu babeur ona Alkatiri tan ba ita foin hatene katak nia familia hetan privileziu baran husi OJE.
Hau la hatene saida lolos mak señora Nurima nia servisu, hau hanoin katak nia mos servisu ba ZEESM tanba iha señora nia Fãcebook nia dala barak tau informasaun ZEESM nian, hanesa nia mak sai relasaun publiku ba ZEESM. Presu atu semu aviaun senõra nee mak hatene, foin hahu hakerek kona ba hotel foun ida Ambeno, karik ema los duni, sira mak hetan benefisiu barak, sira mak goja mesak povu maubere nia osan,Señora Nurima sai relasaun publiku ba ZEESM la to ona, nia mos sai nain boot ba partidu FRETILIN.
Hau moe uainhira hau haree sira halimar ho ita nia bandeira , hau moe no hau laran moras no hau hanoin hau aman tanba nia mate tan bandeira ida nee. Señora Nurima no nia grupu mak la hatene saida mak lakon famlia hodi hetan ita nia independensia, nunee sira halimar ho bandeira lulik nee.Alkatiri hira mate ba ukun aan?
Grupu Alkatiri favor hanoin lai Nicolau Lobato, Avó Xavier no ema seluk, sira mos merese hetan foto iha bandeira FRETILIN nian ka lae? Balun sei moris, DOUTOR Ramos Horta sei moris, Rojeiro Lobato sei moris tanba sa tau deit Maun Marii no Maun Lu nia foto? Imi nia propaganda foer tebes, imi nia intrese bot liu dignidade, imi nia kanteen ba poder halo imi lakon imi nia dignidade i iha tinan 2017 imi sei koko imi nia kaben rasik.
Favor respeita bandeira FRETILIN.
