JRH tau fotu ida (haree iha leten) no nia halo risku barak iha FRETILIN nia foto nomos iha Maun Lu nia foto no nia hakerek vota numeru 1.
Triste tebes hare’e Premiu Nobel da Paz ida halo insulto no instiga violensia wainhira hakerek iha Facebook.
Maun Jose Ramos Horta wainhira halimar ho bandera FRETILIN nia halimar ho ema rihun ba rihun ke mate ba bandeira ida ne'e. Tan deit simu apoiu husi Maun Xanana laos ba tafuit fali ba Maubere Oan ke mate, to'o ohin loron imi tuur iha kadeira boot hodi ukun ita, maibe Maun JRH seidauk tur komesa ona kria instabilidade nomos insulta fali ita nia lider seluk no bandeira lulik FRETILIN nian.
Jose Ramos Horta tenki kuidadu tanba povu laos beik hanesan sira hanoin, povu maubere matenek no se sira hanoin katak imi sei halo krizi hanesan 2006 sira sei fo'o sira nia votu ba Maun Lu tanba durante nia ukun povu maubere la fakar raan hanesan wainhira Maun Horta no Maun Xanana ukun.
Povu Maubere presiza paz no estabilidade hodi moris, funu no raan fakar barak ona.
Maun Ramos Horta dehan katak wainhira nia tuur fila fali iha Prezidente nia kadeira, nia sei hamonu Governu Maun Taur nian, maibe hau hanoin Maun Horta dehan ida ne'e hodi kria instabilidade ka hodi bosok povu maubere? Maun Ramos Horta hatene ka lae katak nia maka Konstituisaun nia guardiaun? Ramos Horta hatene ka lae ke nia ba jura hodi honra ita nia Konstituisaun? Maun Ramos koko estuda lae oituan artigu 86 no artigu 112 Konstituisaun Timor nian hodi haree took se konstituisaun fo'o dalan ba ita bot hamonu governu ida ne'e ka lae? Ita nia lei inan la fo'o dalan hodi hamonu Maun Taur nia governu. Maun Horta ba halo golpe de estadu ida? Hau la fiar ida ne'e, Maun Horta ema matenek no hau fiar katak la kohi hakanek povu maubere dala ida tan. Los ka lae?
Husu ba ukun nain sira hotu hodi hadomi, respeita no husik povu maubere moris iha paz no dignidade nia laran.
Boa sorti ba kandidatu nain rua iha eleisaun Prezidensial 2022.
